طبعا الكل عارف النجمة ألفرخه اللامعة اللي عملت أغنية ( إدبحني يا معلم ) اللي نزلت على نجوم إف إم من فترة قريبة
بل و على قنوات الراديو كلها تقريبا .
انطلاقا من الشهرة اللي حققتها الأغنية دي قامت شركة ( روتانا فور تشيكن ) بإرسال طاقم من الغربان مكوّن من مذيع
و عدد من المصورين و ذلك لإلقاء الضوء أكثر على نجمتنا الساطعة .
المهم راح الطاقم ده متوجه إلى مزرعة الدواجن اللي الفرخة عايشة فيه وراح المذيع مخبط على باب العشة
تك تك تك تك
النجمة فتحت الباب و بصت فاتخضت راحت قافلة الباب بسرعة
المذيع : حضرتك متخافيش إحنا جايين لحضرتك من شركة ( روتانا فور تشيكن ).
النجمة : و الله ؟ . طب ثواني . و راحت نجمتنا فاتحة الباب و دخلت الطاقم .
النجمة : إتفضلوا إرقدو عل البيض لغاية لما أجيبلكوا حاجة تشربوها . المذيع : لأ مفيش داعي حضرتك , إحنا جايين نعمل مع حضرتك إنترفيو مش أكتر . النجمة : لأ اتفضلوا براحتكو . إسألوني اللي إنتو عايزينه .
المذيع : أولاً , ممكن نجمتنا تعرف نفسها للجمهور .
النجمة : كوكي المذيع : ممكن الإسم الثلاثي معلش ؟ .
النجمة : كوكي بيض الخزين مسلوق .
المذيع : و بالنسبة للمؤهل الدراسي ؟ .
النجمة : ليه الإحراج ده بقة , للأسف مفيش , بس بعرف أقرا و أنكش .
النجمة : عندي 31 شهر .
المذيع : طبعا إحنا عارفين إن كل نجم و ليه هوايات , فإيه هيّا هواياتك ؟ .
النجمة : الصراحة معنديش غير هواية واحدة و هي في نفس الوقت موهبة . الحمد لله بكاكي حلو أوي .
المذيع : و يا ترى بتحبي تكاكي لمين ؟
النجمة : بحب أكاكي للفنان ( كتكوت الصغيّر ) اللي إشتهر بأغنية ( العلف العلف العلف ).
المذيع : ممكن نجمتنا تقولنا إزاي دخلت الفن من أوسع أبوابه ؟ .
النجمة : و الله أنا كنت مقدمة في ( فراخ أكاديمي ) في أحد الأقاليم و كسبت الحمد لله بفضل ربنا أولا و الجمهور المذيع : في نهاية الحوار عايزين نجمتنا تقول كلمة للجمهور .
و فجأة دخل صاحب المزرعة و ف إيده سكينة , راحت الفرخة بلعت ريقها
و قالت : أتمنى إن جمهوري العزيز يفتكرني بالخير , وسلام بقة عشان رايحة أصور الكليب .
المهم بعد يوم إنتشر خبر وفاة نجمتنا على جميع القنوات اللي بتطير و الأرضية و عم الحزن عل الجميع.
و واجب علينا إننا نقرالها الفاتحة
و عل العموم بالهنا و الشفا للي كلها
و بقوله اللي ياكل لوحده يزور
ـــــــــــــــــــــــــــــــــــــــــ اتمني ان ينال اعجابكم ـــــــــــــــــــــــــــــــــــ
الثلاثاء مايو 04, 2010 6:41 pm
